Romët me marsh kundër korrupsionit dhe dhunës

Përmes një marshi protestues, Fondacioni “Romët për Demokraci” ka kërkuar që lufta kundër korrupsionit dhe dhunës, të jetë një ndër prioritet e para të vendit, ky marsh filloi para Komisionit Shtetëror të Zgjedhjeve dhe përfundoi para Ministrisë së Punëve të Brendshme. Sipas këtij fondacioni, romët si etnitet po ballafaqohen me padrejtësi të mëdha dhe majorizime në këtë shoqëri.

“Jemi mbledhur këtu të bashkuar me solidaritet që të ballafaqohemi me këto padrejtësi të mëdha, padrejtësi e cila është e shpërndarë me kërcënime të dhunës politike dhe nga korrupsioni dhe rrezikim të demokracisë, e cila po lejon që këto fenomene të vazhdojnë. I kemi vëzhguar zgjedhjet presidenciale dhe vetëm disa orë pasi janë hapur vendvotimet, anëtarët tanë janë kërcënuar nga disa parti, vetëm pse kanë publikuar se një ditë para zgjedhjeve votat e vendbanimet rome po blihen.”, – deklaroi drejtoresha e Fondacionit “Romët për Demokracinë”, Selvije Mystafi Allkan.

Nga fondacioni pohuan se zgjedhjet e 8 majit do t’i vëzhgojnë me 200 vëzhgues, por nuk ndjehen të sigurtë, prandaj kërkuan takim me ministrin e MPB-së, që t’i sigurojnë se janë të sigurtë dhe se drejtësia duhet të vlejë edhe për këtë pjesë të shoqërisë. Kërcënimi i lirisë së shprehjes nuk është demokraci, por anarki.