Snajperi i SWAT qëlloi armën e atentatorit të Trump, zbardhen detaje nga raporti sekret

Një snajper policie potencialisht shpëtoi jetë duke qëlluar pushkën e atentatorit të mundshëm të Donald Trump dhe duke e rrëzuar atë, thotë një hetim.

Sipas një raporti nga kongresmeni i Luizianës, Clay Higgins, plumbi i snajperit dëmtoi armën e Thomas Matthew Crooks dhe ndërpreu synimin e tij pasi ai realizoi të shtënat e para në Butler, Pensilvani. Pak çaste më vonë, një snajper i Shërbimit Sekret e vrau atë.

Raporti vjen pasi Shërbimi Sekret ricakton përkohësisht disa truproja nga Presidenti Joe Biden tek Trump, sipas mediave amerikane. Trump do t’i jepet gjithashtu mbrojtje xhami antiplumb për ta lejuar atë të rifillojë mitingjet në natyrë.

Ish-presidenti nuk kishte mbrojtje gjatë mitingut të tij të 13 korrikut në Butler, kur një plumb gati e goditi atë në kokë.

Raporti i Higgins tha se një anëtar i SWAT ishte i pari që qëlloi në drejtim të vrasësit të Trump – nga 100 metra largësi.

Me një të shtënë të vetme, ai qëlloi drejt personit të armatosur dhe goditi një pjesë të pushkës së tij, thuhet në raport.

Kjo e rrëzoi personin e armatosur nga pozicioni i tij përkohësisht, por, “pas vetëm disa sekondash”, ai “u doli përsëri”, përpara se të qëllohej për vdekje nga një gjuajtës i Shërbimit Sekret.

Nivelet e sigurisë rreth ish-presidentit janë rritur që atëherë.

Transferimi i agjentëve të Shërbimit Sekret është për shkak të kërcënimeve ndaj Trump, 78 vjeç, dhe i mundësuar nga orari i reduktuar i udhëtimit të zotit Biden pasi ai u largua nga gara zgjedhore, sipas një raporti në The New York Times.

Oficerët e ricaktuar ishin përgjegjës ose për të udhëtuar me zotin Biden, ose për të shkuar përpara tij për të vendosur masa sigurie në një ngjarje, tha një burim për gazetën.

Kimberly Cheatle, drejtoresha e Shërbimit Sekret, dha dorëheqjen më 23 korrik pas një seance dëgjimore në Dhomën e Përfaqësuesve të SHBA për atentatin.

Politikanët në Komitetin e Mbikëqyrjes së Dhomës së Përfaqësuesve kritikuan mungesën e informacionit në përgjigjet e saj ndaj pyetjeve të tyre në lidhje me planifikimin e sigurisë dhe sesi oficerët iu përgjigjën raporteve për sjelljen e dyshimtë të të armatosurit përpara të shtënave.

I armatosuri Thomas Matthew Crooks, 20 vjeç, u qëllua dhe u vra nga një ekip kundër-snajperist i Shërbimit Sekret pasi qëlloi tetë plumba në drejtim të zotit Trump nga një çati pak jashtë perimetrit të sigurisë së tubimit.

FBI po heton aktualisht dështimin e mbrojtjes dhe liderët politikë në Kongresin e SHBA kanë nisur gjithashtu hetimet.