Trajneri i Spanjës: I bëjmë thirrje UEFA-s që t’i ‘lidhë këmbët’ Kroos-it, mëkat që ai tërhiqet nga futbolli

Luis de la Fuente ka folur në një konferencë për shtyp në prag të ndeshjes kundër Gjermanisë. Këto janë fjalët e trajnerit të Spanjës, raportuar nga “Marca”: “Gjermania na respekton, ashtu siç e respektojmë ne.

Nuk i kam dëgjuar deklaratat e kundërshtarit, por gjithsesi më shqetësojnë pak. E di mirë potencialin tonë, të tyrin, do të luajmë në kushte të barabarta. Është pothuajse si finale, do të jetë sfidë mjaft e ekuilibruar”.

Rëndësia e minutave të para: “Gjermania gjithmonë e nis fuqishëm, por ne do të përpiqemi ta kundërshtojmë duke vepruar në të njëjtën mënyrë. Do të japim gjithçka që në fillim. Mënyra më e mirë për t’u mbrojtur është të veprojmë në të njëjtën mënyrë.

Gjermania ka një ide loje shumë të ngjashme me tonën, por do të përpiqemi të imponohemi në fund. Në këtë lloj ndeshjeje, kushdo që bën më pak gabime, ka shanset më të mëdha për të ecur përpara”.

Penalltitë e mundshme: “Gjithçka e provojmë në stërvitje, qofshin penalltitë, goditjet e lira, goditjet nga këndi… Po, i kemi përgatitur, pa menduar për asgjë, ose pa menduar për gjithçka”.

Olmo, startues i mundshëm: “Nuk do të them nëse do të luajë apo jo, por Dani është me të vërtetë gati. Ai e njeh futbollin gjerman, mendimi i tij ka rëndësi, ashtu si ai i Grimaldos. Në çdo rast, ne e njohim shumë mirë Gjermaninë”.

Përballja me mikpritësit e Europianit nuk është problem: “Në këtë nivel, faktori fushë nuk ka shumë rëndësi. Kemi lojtarë me shumë përvojë, që nuk frikësohen nga mjedisi më armiqësor. Edhe ata që luajnë në shtëpi kanë presion të madh. Ne do të luajmë me gëzim, besim, siguri, duke e ditur që kemi një rival të madh përpara”.

Musiala-Wirtz krahasohen me Williams-Yamal: “Ekipet tona janë shumë më tepër se këto dy ose katër lojtarë, edhe nëse janë katër nga lojtarët më të talentuar në Europë. Megjithatë, të gjithë varen nga skuadra, individualitetet duhet të përcaktojnë situata të veçanta. Nëse zhvillojmë konceptin e ekipit, ne do të jemi më të fortë, do të kemi ende shumë hapësirë ​​për përmirësim”.

Rëndësia e Toni Kroos: “Mendoj se Kroos është një kampion, një futbollist i nivelit superior, që nuk duhet të largohet kurrë nga futbolli. Është e pakuptueshme që e bën këtë, sepse mbetet ende futbollist i madh.

Ka sjellë talent, cilësi dhe karizëm përsëri në ekipin e tij kombëtar. Do të përpiqemi të sigurohemi që ai të mos ketë mundësi ta marrë topin me lehtësi, t’i kufizojmë opsionet e tij të pasimeve. E thënë më qartë; do t’i kërkonim UEFA-s t’ia lidhte këmbët”.