Али Ахмети најавува објавување на над 110 илјади тајни југословенски досиеја – Дали ќе се затресе Северна Македонија?

Лидерот на Демократската унија за интеграција (ДУИ), Али Ахмети, најави објавување на над 110 илјади тајни документи на поранешните југословенски служби, кои директно се поврзани со тогашна Македонија и со политичките прогони врз Албанците и Македонците. Ова Ахмети го соопшти во емисијата „Дебат на Шења“ на ТВ Шења, пренесува Флака.

Ахмети нагласи дека досиејата се обезбедени од државните архиви на Хрватска и содржат вознемирувачки докази за следења, монтирани судски процеси, егзекуции и политички атентати, оркестрирани од политиките на Белград и спроведувани од локалните структури на поранешниот систем во Македонија.

„Ако ги земете досиејата, јасно ќе видите: шеесет години по ред, Македонци биле осудувани како пробугарски елементи, наводно дека работеле за Голема Бугарија, додека Албанците биле осудувани како националисти и сепаратисти кои сакале да создадат Голема Албанија. И Македонци и Албанци завршувале на Голи Оток. Сето тоа е документирано“, изјави Ахмети.

Тој изрази зачуденост зошто државните институции во Северна Македонија сè уште немаат храброст да ги објават овие документи, додавајќи дека доколку тоа не го стори државата, истите ќе бидат објавени од ДУИ.

„Не знам зошто немаат храброст сами да ги извадат документите на виделина, туку чекаат јас да ги изнесам во јавност. Станува збор за над 110 илјади тајни документи од архивите на Југославија, кои ние ги обезбедивме од хрватските архиви“, рече Ахмети.

На прашањето на модераторот дали оваа најава значи директно објавување на досиејата од страна на неговата партија, Ахмети појасни дека процесот ќе биде професионален и заснован на научни стандарди.

„Треба да работат историчари. Ангажирани се историчари кои ќе ги објават сите документи во нивната оригинална верзија, без никакви интервенции“, истакна тој.

Ахмети нагласи дека лично видел шокантни документи, во кои, според него, „млади Македонци, револуционери и патриоти, биле осудувани со монтирани судења“, додека врз Албанците биле применувани истите репресивни сценарија.

„Имам видено егзекуции, политички атентати, и сето тоа било правдано со обвинувања дека Македонците работат за Бугарија, а Албанците за Голема Албанија. Сето ова било однапред подготвено сценарио од Белград, од тогашните политики кои се спроведувале од Словенија до Гевгелија“, нагласи Ахмети.

Тој отворено ги обвини македонските политичари од поранешниот систем дека биле слуги на Белград, спроведувајќи ги неговите планови на штета на граѓаните на Македонија, особено на Албанците.

Говорејќи за антиалбанските политики, Ахмети изјави дека „лабораторијата на антиалбанските експерименти била во Скопје“, од каде, според него, репресивните сценарија подоцна биле применети и во Косово.

„Најпрво во Македонија беше применето бришењето на Албанците како конститутивен елемент од Уставот, а потоа истиот модел беше применет во Косово, со укинување на Уставот и суспендирање на автономијата. За првпат мешаните паралелки беа воведени во тогашна Македонија, а потоа и во Косово“, изјави Ахмети.

Овие ставови и податоци Ахмети ги изнел и на крајногодишниот брифинг со главните уредници на националните медиуми, на кој присуствувал и главниот уредник на ФЛАКА, Дритон Зенку.

Најавата за објавување на југословенските досиеја се очекува да отвори широка јавна и институционална дебата, враќајќи го вниманието кон еден од најмрачните периоди од политичката историја на регионот, со длабоки последици врз меѓуетничките односи и соочувањето со минатото. ФЛАКА