Kievi pa rrymë dhe ujë, Rusia kryen sulm masiv ajror në Ukrainë

Autoriteti shtetëror i energjisë i Ukrainës njoftoi se po aplikon ndërprerje emergjente të energjisë pas një sulmi masiv me dronë dhe raketa nga Rusia në Kiev dhe qytete të tjera ukrainase më 26 gusht.

Kryetari i Kievit, Vitali Klitçko, tha se furnizimi me ujë dhe energji elektrike në disa pjesë të kryeqytetit është ndërprerë ndërsa Rusia nisi sulmin e saj në shkallë të gjerë gjatë orëve të para të mëngjesit.

Në një mesazh, zyra e Presidentit të Ukrainës, Volodymyr Zelensky, dënoi siç e quajti ai “dëshirën e Rusisë për të shkatërruar sektorin” ukrainas të energjisë dhe premtoi se kjo “do t’i kushtojë shumë Rusisë,” përfshirë infrastrukturën e saj.

Ndërkohë, shefi i stafit të presidentit ukrainas, Andriy Yermak, u bëri thirrje aleatëve të Kievit të lejojnë Ukrainën të përdorë armët me të cilat e ka furnizuar Perëndimi për të kryer sulme me rreze të gjatë kundër Rusisë.

Yermak, tha se kjo do të “përshpejtojë fundin e terrorit rus”.

Sipas zyrtarëve ukrainas, forcat ruse shënjestruan disa qytete ukrainase, duke vrarë të paktën tre persona dhe plagosur disa të tjerë.

Një person u vra dhe një ndërtesë banimi u dëmtua në qytetin veriperëndimor të Lutskut, sipas kryetarit të qytetit, Ihor Polischuk.

Dy persona u vranë në rajonet Zaporizhja dhe Dnipropetrovsk, sipas autoriteteve lokale.

Në rajonin Poltava, pesë persona u plagosën pasi një objekt industrial u godit.

Tre shpërthime u raportuan në rajonin e Vinitsia.

Më herët, 16 rajone në Ukrainë, përfshirë kryeqytetin Kiev, ishin nën alarme të reja për sulme ajrore pas sulmeve me valë dronësh nga Rusia më 26 gusht.

Komanda e Forcave Ajrore të Ukrainës kishte paralajmëruar qytetarët që të mos injorojnë alarmin e sulmit ajror pasi kishte zbuluar ngritjen e 11 bombarduesve rusë ‘Tu-95MS’.

Komanda shtoi se kishte zbuluar lëvizje dronësh në disa rajone dhe në Kiev, ndërsa Marina e Ukrainës tha se në Detin e Zi gjendeshin katër anije ruse që mbanin deri në 28 raketa lundrimi Kalibr.

Ndërkohë, Ministria e Mbrojtjes e Rusisë pretendoi se 20 dronë ukrainas ishin shkatërruar gjatë natës.

Guvernatori i rajonit Saratov të Rusisë, Roman Busargin, tha se dronët kishin shënjestruar qytetet Saratov dhe Engels dhe kishin dëmtuar dy ndërtesa banimi.

Ai tha se dëmi u shkaktua nga mbetjet që ranë pasi sistemet e mbrojtjes ajrore qëlluan dronët.

Agjencitë ruse të lajmeve raportuan se katër gra u plagosën në Saratov dhe se një grua u shtri në spital.

Nuk u raportuan viktima në Engels.

Engels dhe Saratov ndodhen në brigjet e kundërta të lumit Vollga, me një bazë ushtarake strategjike të bombarduesve që ndodhet rreth 12 kilometra larg nga vendi ku u kapën dronët.

Saratov është rreth 900 kilometra nga kufiri ukrainas.

Duke cituar zyrën e shtypit të aeroportit, agjencitë e lajmeve thanë se fluturimet u kufizuan në aeroportin rajonal të Saratovit.

Radio Evropa e Lirë nuk mundi të verifikonte në mënyrë të pavarur këto raportime.

Ukraina dhe Rusia këmbëngulin se nuk synojnë civilët në sulmet e tyre, por infrastrukturën kritike luftarake./REL