“Korridori 8”, Nikollovski: Premtime joreale nga qeveria e kaluar

Qeveria e kaluar ka dhënë premtime joreale sa u takon projektit dhe afateve për ndërtimin e akseve të Korridorit 8. Kështu thotë ministri i Transportit Aleksandar Nikollovski i cili tani nuk thotë një datë konkrete se kur pret të përfundojë realizimi i pjesës që është në dorë të konzorciumit Behtel-Enka. Nikollovski megjithatë beson se deri në fund të mandatit të tij, do të ketë lidhje me autostradë nga Shkupi, deri në Ohër.

“Për fat të keq, qeveria paraprake e LSDM-së dhe BDI-së ka dhënë premtime joreale sa i takon projektit. Premtimi më joreal është që shpronësimi do të zgjasë deri në qershor të 2023-shit, që është para një viti, çështje totalisht joreale. Gjithashtu, në largim, qeveria teknike e Talat Xhaferit më 13 qershor kishte firmosur rritje të vlerës së marrëveshjes për 252 milion euro që është shumë jashtëzakonisht e madhe dhe të cilën ne e asgjësuam. Kanë bërë dhe kanë premtuar gjëra që s’kanë mundur t’i realizojnë, por ne jemi këtu që t’i zgjidhim problemet”, deklaroi Aleksandar Nikollovski, ministër i Transportit.

Nëse ka nevojë për rishikim të projektit, Nikollovski nuk mohon që kjo të ndodhë. Një nga problemet më të mëdha, sipas tij është shpronësimi i tokave ku ndërtohet rruga. Nuk përjashtohet as mundësia e ndryshimeve ligjore.

“Ka probleme, dhe në fakt ky është problemi më i madh sa i takon shpronësimit. Bisedojmë me institucionet kompetente se si të gjejmë zgjidhjen më të mirë. Një pjesë e zgjidhjes është ekipimi i Drejtorisë për çështje pronësore juridike por duhet të mendojmë edhe për ndryshime ligjore që të përshpejtohen projektet sepse shpronësimi është problem në nivel të shtetit, është shumë i ngadalshëm, ka shumë procedura administrative, zgjat me vite dhe duhet të gjejmë zgjidhje dhe ta zgjidhim. Për momentin, kjo është kokëdhimbja më e madhe për të gjitha projektet në Maqedoni”, u shpreh Aleksandar Nikollovski, ministër i Transportit.

Projekti për Korridorin 8 përfshin disa akse rrugore. Pjesa e parë, ndërtimi i Autostradës Kërçovë-Ohër, sipas Nikollovskit pritet të përfundojë në fund të vitit 2026. Pjesa e dytë Kërçovë-Bukojçan është në procedurë të përgatitjes së procedurës së tenderimit. Pjesa e tretë, bëhet projektimi i rrugës Bukojçan-Gostivar dhe shpronësimi i tokave ku do të kalojë traseja Gostivar–Tetovë.

Qeveria e kaluar premtoi kompletimin e Korridorit 8, ose gjithsej 108.8 kilometrave, deri në vitin 2027 dhe tha se do të kushtonte 1.3 miliardë euro. /Alsat.mk