Gazetari Furkan Saliu: Rasti me Nevrij Ademin tregon partizimin e policisë dhe shkeljen e fjalës së lirë

Pas ndalimit të gazetarit të Tetova Sot, Nevrij Ademi, ka reaguar gazetari Furkan Saliu, duke e cilësuar rastin si shembull të partizimit të policisë dhe presionit politik ndaj mediave.

Sipas Saliut, ndalimi i gazetarit është urdhëruar në mënyrë joformale dhe abuzive.
“#DajxhaRakip kërkon nga nipi i cili është komandant në stacionin policor të Tetovës që të thirret gazetari Nevrij Ademi në bisedë informative. Thirrja bëhet nëpërmjet telefonit. Pa shkresë zyrtare, pa arsye,” shkroi ai.

Ai e ka cilësuar si “kulmin e idiotizmit” përpjekjen që t’i merret telefoni gazetarit në stacionin policor.
“Krejt kjo për shkak se dikujt iu ka kujtu të paraqesë një rast në polici, me akuzën se iu kanë keqpërdor të dhënat personale. Si t’i themi kësaj përpos partizim i policisë? Si mos t’i themi kësaj keqpërdorim i MPB-së për qëllime partiake?” tha Saliu.

Gazetari shtoi se ky rast nuk është vetëm sulm ndaj Nevrij Ademit, por ndaj tërë profesionit.
“Puna e Nevrij Ademit mund të mos iu pëlqej. Mund të keni vërejtje e akuza, por në këtë rast nuk sulmohet vetëm ai dhe Tetova Sot. Sulmohet gazetaria! Çka na pret nesër neve?” pyeti ai.

Saliu rikujtoi paralajmërimet e tij për rritjen e presionit politik mbi mediat.
“Ajo që prej ditës së parë kur u votua qeveria e re e kam paralajmëruar… Shkelje brutale e fjalës së lirë, presion dhe kthim në ditët e errëta të regjimit. Ups, e përmenda edhe unë #dajxhin,” përfundoi ai.