Sheshi “Skënderbeu” foli me një zë: 10 fotografi që tronditën Shkupin dhe rikthyen UÇK-në në zemrën e kombit

Me flamuj kuq e zi, plisa në kokë dhe thirrje për drejtësi, mijëra shqiptarë nga Maqedonia e Veriut, Kosova, Shqipëria dhe diaspora u mblodhën sot në sheshin “Skënderbeu” në Shkup, në një demonstratë gjithëkombëtare në mbështetje të ish-krerëve të Ushtrisë Çlirimtare të Kosovës që po gjykohen në Hagë.

Pas protestave të mbajtura në Prishtinë, Tiranë, Hagë dhe Strasburg, edhe nga kryeqyteti i Maqedonisë së Veriut u ngrit fuqishëm zëri në mbrojtje të drejtuesve të UÇK-së, duke kërkuar drejtësi dhe pafajësi për ta. Demonstrata u organizua nga Organizata e Veteranëve të Luftës së UÇK-së (OVL-UÇK), ndërsa sheshi u mbush me pankarta ku shkruhej: “Çlirimtarët duhet të nderohen, jo të gjykohen”, “UÇK – luftë e drejtë”, “Liria nuk gjykohet”.

Ali Ahmeti: Procesi në Hagë duhet të marrë epilog të pafajësisë

Një nga fjalimet kryesore në protestë u mbajt nga Ali Ahmeti, bashkëthemelues i UÇK-së dhe lider i BDI-së, i cili theksoi se procesi gjyqësor në Hagë duhet të përfundojë me pafajësi për ish-krerët e UÇK-së, duke e cilësuar atë si një proces politik dhe të padrejtë.

Ahmeti sqaroi qartë se protesta nuk është e drejtuar kundër shtetit të Maqedonisë së Veriut dhe se UÇK-ja nuk ka qenë kurrë kundër asnjë populli.

“Ne kemi dashur lirinë, por jo duke ua mohuar lirinë popujve të tjerë. Ushtria jonë nuk ka qenë kundër asnjë populli dhe as kundër popullit serb. Demonstrata e sotme nuk është kundër shtetit të Maqedonisë së Veriut,” deklaroi Ahmeti.

Ai theksoi se të akuzuarit në Hagë kanë qenë kontribuues të rëndësishëm për paqen, stabilitetin dhe ndërtimin e institucioneve në rajon:

“Këta që sot ndodhen prapa grilave kanë kontribuar për stabilitetin dhe paqen, jo vetëm në Kosovë, por edhe në të ardhmen e këtij shteti. Ata kanë qenë presidentë, kryeministra, kryetarë kuvendi dhe drejtues institucionesh, duke nënshkruar dhjetëra e qindra marrëveshje për një Maqedoni më të prosperuar dhe jo të frikësuar nga UÇK-ja apo nga njerëzit me plagë në trup.”

Duke folur për akuzat që rëndojnë mbi ish-krerët e UÇK-së, Ahmeti theksoi se ato janë të pabazuara dhe se lufta çlirimtare nuk duhet të njolloset:

“Të gjithë ata që ndodhen në këtë gjykatë akuzohen për vepra të pabëra. Akuza për shtëpinë e verdhë dhe për ndërmarrje të përbashkët kriminale nuk duhet dhe nuk mund ta njollosin historinë e luftës çlirimtare.”

Ahmeti theksoi se shqiptarët sot, kudo që janë, kanë folur me një zë të vetëm:

“Shqiptarët folën njëzëri. Është koha që djemtë tanë të kthehen në shtëpi. Në emër të popullit, ata janë të pafajshëm dhe lufta jonë ka qenë e pastër.”

Ai e cilësoi luftën e UÇK-së si të drejtë dhe të shenjtë, duke nënvizuar se ajo ishte një përpjekje gjithëkombëtare:

“Lufta e Ushtrisë Çlirimtare të Kosovës është e shenjtë. Për këtë arsye, burra e gra, të rinj e të moshuar – jemi UÇK.”

Në fund të fjalimit, Ahmeti përkujtoi figurat historike dhe dëshmorët e kombit, duke theksuar vazhdimësinë e qëndresës shqiptare:

“Lavdi dëshmorëve të kombit dhe e përjetshme shqiptaria.”

Mirënjohje për SHBA-në, NATO-n dhe Evropën

Në një pjesë tjetër të fjalimit, Ahmeti shprehu mirënjohje për mbështetjen ndërkombëtare gjatë luftës së Kosovës:

“Amerikë, NATO, Evropë, faleminderit që filozofinë dhe veprimtarinë e njerëzve më të mëdhenj të kombit tonë e keni mbështetur përmes Ushtrisë Çlirimtare të Kosovës, duke ndalur gjenocidin ndaj popullit të saj.”

Azgan Haklaj: Askush nuk mund ta njollosë UÇK-në

Para qytetarëve foli edhe përfaqësuesi nga Shqipëria, Azgan Haklaj, i cili tha se Ushtria Çlirimtare e Kosovës përfaqëson një nga epokat më të ndritura të historisë shqiptare.

“Pas epokës së Skënderbeut dhe Lidhjes Shqiptare të Prizrenit, epoka e Ushtrisë Çlirimtare të Kosovës është më e ndritura. Askush në faqen e dheut nuk mund ta njollosë UÇK-në e lavdishme.”

Ai shtoi se UÇK-ja me gjakun e saj ka nënshkruar lavdinë më të madhe të historisë sonë kombëtare.

Shqipdona Mazari: Ata luftuan që fëmijët të jetojnë të lirë

Fjalim emocionues mbajti edhe Shqipdona Mazari, vajza e komandantit të ndjerë nga Struga, Nuri Mazari.

“Hashim Thaçi, Kadri Veseli, Jakup Krasniqi, Rexhep Selimi dhe të gjithë ata që u rreshtuan në anën e drejtë të historisë nuk luftuan për privilegje apo poste, por që asnjë nënë shqiptare të mos e fshihte fëmijën nga frika e zhdukjes.”

Hysni Gucati: Kërkojmë drejtësi, jo drejtësi politike

Kryetari i OVL-UÇK-së, Hysni Gucati, deklaroi se UÇK-ja ka lindur nga populli dhe se populli sot qëndron pas saj.

“Ne sot kërkojmë drejtësi, jo drejtësi politike. Ajo gjykatë i ngjan gjykatave të ish-Jugosllavisë së Titos.”

Ai mohoi kategorikisht pretendimet për krime dhe transplantim organesh, duke theksuar se UÇK-ja nuk ka kryer krime ndaj civilëve.

Protestë pa incidente, nën masa të shtuara sigurie

Protesta u zhvillua nën masa të shtuara sigurie policore dhe kaloi e qetë, pa asnjë incident. Nga Ministria e Punëve të Brendshme u konfirmua se situata ka qenë e qetë edhe në kufij dhe se asnjë ish-përfaqësues i UÇK-së nuk është ndaluar apo arrestuar.

Organizatorët njoftuan se një pjesë e ish-luftëtarëve nuk kanë udhëtuar drejt Shkupit për shkak të frikës nga ndalime eventuale mbi baza të fletarrestimeve të iniciuara nga autoritetet serbe.

Demonstrata përfundoi me valle shqiptare, ndërsa nga sheshi “Skënderbeu” u përcoll mesazhi se shqiptarët, kudo që janë, qëndrojnë të bashkuar në mbrojtje të luftës çlirimtare dhe të ish-krerëve të UÇK-së. Gazeta Flaka

45

SONDAZHI JAVOR

A mendoni se qeveria aktuale po bën mjaft për të përmirësuar gjendjen ekonomike dhe jetën e qytetarëve?

• 
• 
• 
• 
• 
• 
•