Nafie Selmani: Ambasadori Meidani, një dritë shprese në zymtësinë politike
Botuar nga Flaka
Atë që pushtetarët e VLEN-it nuk guxuan, nuk deshën ose nuk dinin ta bëjnë dje, e bëri ambasadori Denion Meidani.
Që në fillim të mandatit të tij, Meidani u angazhua hapur për mirëqenien politike dhe institucionale të shqiptarëve në Maqedoninë e Veriut. Ai ka marrë rol aktiv në raste konkrete, si fëmijët e Nerashtit, çështja e Bibliotekës në Manastir, dhe problematika të tjera që prekin drejtpërdrejt dinjitetin dhe të drejtat e shqiptarëve.
“Dje, ai ia dha vulën këtij angazhimi dinjitoz duke u rreshtuar hapur dhe pa ekuivok në krah të studentëve të Tetovës, në mbështetje të së drejtës së tyre të padiskutueshme që provimi i jurisprudencës të mbahet në gjuhën shqipe. Meidani foli shqip, qartë dhe publikisht, duke artikuluar dhe përkrahur një kërkesë që buron nga Kushtetuta, nga ligji dhe nga parimet elementare të barazisë,” shkruan Selmani.
Në anën tjetër, përfaqësuesit politikë të VLEN-it zgjodhën heshtjen aty ku duhej të tregonin zë, guxim dhe përgjegjësi institucionale.
Më keq, sipas Selmanit, një eksponent i VLEN-it, ish-kryetar i Alternativës, Zeqirija Ibrahimi, për dështimin dyvjeçar si qeveritarë dhe për provimin e jurisprudencës në gjuhën shqipe për studentët shqiptarë, e gjeti fajin te BDI. “Vreri për dështimin e tyre e paska zbrazur në Facebook, në hapësirën që u takon qytetarëve, jo pushtetarëve. Kjo më po i kalon të gjitha vijat e mirëkuptimit,” thekson Selmani.
Ajo shton:
“Zeqirija, ti dhe shokët tuaj erdhët në pushtet me premtimin për ndryshim. Ne ju besuam. Ne ju votuam pikërisht mbi këtë premtim. Mos e relativizoni përgjegjësinë tuaj duke ia adresuar dështimet dikujt tjetër. Nëse nuk keni guxim të flisni me gjuhën e studentëve aty ku merret vendimi, atëherë mos u përpiqni të mbuloni dështimin tuaj me statuse në Facebook dhe akuza të përsëritura si papagaj, ‘BDI, BDI, BDI’… Të paktën, heshtni. Heshtni se e latë namin. Na keni bërë të pendohemi deri në fund të botës që ju besuam, ju votuam dhe shpresuam se do jeni ndryshe e do ta mbani premtimin për ndryshim, dhe nuk do jeni një kopje shumë më e keqe e të kaluarës. Heshtni, në paçi pak rahmet, se na çmendët!”
Botuar nga Flaka
TË fundit
