Blerant Ramadani tërhiqet nga politika, i kthehet profesionit

Blerant Ramadani njoftoi sot dorëheqjen e tij nga pozita e Sekretarit Gjeneral të Aleancës për Shqiptarët dhe nga angazhimi aktiv në strukturat partiake. Ai e paraqiti këtë hap si një vendim të reflektuar personal dhe profesional.

Në një deklaratë publike, Ramadani theksoi:

“Sot ndodhem në një pikëtakim vendimtar, ku ndërgjegjja profesionale më kërkon të rikalibroj mënyrën se si i shërbej shoqërisë. Prandaj, njoftoj tërheqjen time nga pozita e Sekretarit Gjeneral dhe nga angazhimi aktiv në strukturat partiake.”

Ai shtoi se vendimi i tij nuk është rezultat i mospajtimeve me kolegët, por një zgjedhje personale e bazuar mbi parimet dhe botëkuptimin e tij:

“Në mbledhjen e fundit të kryesisë, vota ime ishte dhe mbetet KUNDËR dorëheqjes kolektive. Kjo votë nuk ishte mospajtim, por botëkuptim. Si inxhinier, unë besoj te strukturat që ngrihen mbi themele të forta, jo te logjika e rrëzimit për të rifilluar nga e para. Unë besoj te stabiliteti.”

Megjithatë, Ramadani tha se respekton shumicën dhe demokracinë si proces:

“Demokracia është arti i respektimit të shumicës. Unë e pranoj këtë realitet dhe zgjedh të liroj rrugën me dinjitet, duke mbetur konsekuent në qëndrimet e mia.”

Ai theksoi gjithashtu fokusin e tij të ardhshëm:

“Energjia ime do ta kanalizoj aty ku vendi ka nevojë jetike: te Shkenca dhe Zhvillimi Strategjik. Kjo nuk është një lamtumirë nga idealet tona, por një bindje e thellë se një vend nuk lartësohet nga retorika e ditës, por nga forca e pakontestueshme e dijes dhe kompetencës.”

Ramadani përmendi edhe rëndësinë e mbështetjes së qytetarëve:

“Për SARAJIN: ajo që ndërtuam bashkë nuk matet me poste. Mbështetja juaj, ajo votë e pastër dhe e sinqertë që më dhuruat, është fitorja ime morale më e madhe. Atë besim e ruaj si kapitalin më të çmuar, si dëshmi se kur politika bëhet me zemër, njerëzit dinë të rreshtohen drejt.”

Ai përfundoi mesazhin me një qasje optimiste për të ardhmen:

“Ky vendim nuk është një lamtumirë, por një ripozicionim. Unë nuk heq dorë nga vizioni për një shoqëri të drejtë. Shihemi në betejat e radhës për parime!” Gazeta Flaka