Kaos në mëngjes: Shembje dheu mbyll përkohësisht aksin Kërçovë–Gostivar
Botuar nga Flaka
Një rrëshqitje e madhe dheu pranë fshatit Kolari ka shkaktuar kaos në aksin rrugor Kërçovë–Gostivar. Nga ora 7:00 e mëngjesit qarkullimi zhvillohet i alternuar vetëm në një korsi, në një segment rreth 30 metra, njofton Ndërmarrja Publike “Rrugët e Maqedonisë”.
Paraprakisht, nga ora 05:40, rruga ishte plotësisht e bllokuar për shkak të shembjes së dheut mbi trasenë.
Sipas njoftimit të LAMM, nga ora 05:45 është vendosur ndalim për automjete të rënda transportuese dhe autobusë në aksin Lisec – Kodra e Diellit. Masa mbetet në fuqi deri në stabilizimin e situatës në terren.
Autoritetet bëjnë të ditur se qarkullimi në rrugët shtetërore zhvillohet në kushte dimërore, me korsi kryesisht të lagështa dhe intensitet të moderuar jashtë zonave urbane. Në vendkalimet kufitare, sipas informacioneve zyrtare, nuk ka pritje të gjata.
Drejtuesve të automjeteve u kërkohet të lëvizin me shpejtësi të përshtatur, të respektojnë sinjalizimin dhe të jenë veçanërisht të kujdesshëm në segmentet që kalojnë nëpër gryka, lugina dhe zona me rrezik për rrëshqitje dheu, si Katllanovë–Veles, Mavrovë–Dibër–Strugë, Vinicë–Berovë dhe Koçan–Dellçevë.
Në fuqi mbetet edhe detyrimi ligjor për posedimin e pajisjeve dimërore. Gazeta Flaka
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
