Bujar Osmani: 19 tetori është 13 gushti i dytë, populli sërish e mbron dinjitetin e vet

Kandidati për kryetar komune i Çairit, Bujar Osmani, në fjalimin e sontëm para qytetarëve, dërgoi një mesazh të fuqishëm: “19 tetori është 13 gushti i dytë.”

“Nëse më 13 gusht 2001 u nënshkrua Marrëveshja e Ohrit, e cila na e riktheu dinjitetin si popull, sot, më 19 tetor, vendosim nëse do ta shfuqizojmë plotësisht atë kornizë apo do të vazhdojmë të funksionojmë sipas saj”, deklaroi Osmani, duke theksuar se këto zgjedhje janë një referendum për të ardhmen e barazisë, të drejtësisë dhe të drejtave gjuhësore të shqiptarëve.

Osmani theksoi se në çdo hap takon njerëz që janë thellësisht të zhgënjyer nga tradhtia e VLEN-it.

“Vijnë njerëz nga VLEN dhe thonë: ‘Kemi votuar për ta, kishim shpresë se do të ishte më mirë’. U them: Mos i nënvlerësoni, është instinkt i njeriut të presë më të mirën, por ata u tradhtuan”, tha Osmani.

Në mënyrë të veçantë, Osmani paralajmëroi ashpër për rikthimin e praktikave të rrezikshme të padukshmërisë dhe diskriminimit:

“Në Ministrinë e Punëve të Jashtme, kur isha ministër, nuk kishte asnjë dokument pa kolona në maqedonisht dhe shqip. Po sot? Po i ndryshojnë vulat, po i largojnë tabelat, gjuha po zhduket. Dhe tani e dërgojnë ligjin për gjuhën shqipe në Gjykatën Kushtetuese për shfuqizim të plotë. Gjuha shqipe është fshirë nga institucionet, ligjërisht dhe fizikisht”, tha Osmani.

Ai dërgoi një thirrje për pjesëmarrje masive në zgjedhje.

“19 tetori nuk është vetëm ditë zgjedhjesh, është ditë kur sërish e mbrojmë dinjitetin, ashtu siç e bëmë në vitin 2001”, përfundoi ai.