Meidani: “Ka disa që janë mërzitur…” – komenton sondazhin e Gazetës Flaka

Ambasadori shqiptar në Maqedonia e Veriut, Denion Meidani, ka reaguar pas publikimit të rezultateve të sondazhit të realizuar nga Gazeta Flaka, duke komentuar debatet dhe reagimet që kanë pasuar.

Në një mesazh publik, Meidani theksoi se ka zëra që janë mërzitur sepse, sipas tij, në momentet më kritike kanë heshtur, ndërsa të tjerë, për shkak të pozitave që mbajnë, e kanë të vështirë të çojnë çështjet deri në fund. Ai përmendi edhe ata që, siç u shpreh, veprojnë nga frika, nga interesat personale apo për klikime, duke nënvizuar se kauza nuk është personale, por e përbashkët.

“Ne që jemi shumicë, ecim vetëm me të drejtën përpara — dhe, për mua, kaq mjafton,” – ka shkruar ambasadori.

Postimi i plotë:

Për të gjithë që pyesni “pse janë hedhur në sulm këto ditë” apo që kanë shkruar “çfarë kanë këta”. Ka disa që janë mërzitur, sepse në momentin më kritik për çështjen heshtën, si, në fakt, kanë heshtur gjithmonë. Ka disa që janë mërzitur, sepse tani, për shkak të pozitave që mbajnë, duhet ta çojnë çështjen deri në fund dhe duket qartë se është një “tango” e vështirë mes palëve. Disa të tjerë, të penguar nga frika, nuk gjejnë dot forcën e së vërtetës për të reaguar ndaj atyre që duhet. Ka disa që i pengon ritmi i Shqipërisë dhe pesha që ajo mbart. Disa të tjerë i pengon vetë e drejta dhe rruga e mbarë. Ka disa që çdo gjë e matin me interesin personal dhe vetëm për të janë të zëshëm. Ka edhe nga ata që e kanë të vështirë të hapin zemrën dhe mendjen për të dashur e vlerësuar të tjerët. Dhe, diku brenda tyre, në ndonjë pozitë, ka mbetur ende një mendësi e vjetruar, e ngecur tek e shkuara, e udhëhequr më shumë nga marrëzia e marazi sesa nga vet arsyeja. Dhe pastaj, ka edhe nga ata që e bëjnë vetëm për klikime. Gjithqysh, këta janë shumë pak dhe kauza nuk jam, s’dua të jem, e kurrsesi s’ka si të jem, unë. Ne që jemi shumicë, ecim vetëm me të drejtën përpara — dhe, për mua, kaq mjafton.

Rezultatet e sondazhit

Në sondazhin e zhvilluar në platformën e Gazeta Flaka, me pyetjen:
“Si e vlerësoni misionin e Ambasadorit shqiptar, Denion Meidani?”, qytetarët kanë dhënë këtë rezultat:

• Shumë mirë – 612 vota (91%)
• Mirë – 27 vota (4%)
• Aspak mirë – 34 vota (5%)

Nga gjithsej 673 vota të regjistruara, rezultati tregon një mbështetje të theksuar pozitive për misionin diplomatik të ambasadorit, me mbi nëntë nga dhjetë votues që e vlerësojnë “shumë mirë”.

Diferenca e madhe mes opsionit dominues dhe alternativave tregon një perceptim të fortë pozitiv në opinionin e ndjekësve të portalit.

Sondazhi është zhvilluar në rubrikën VOX të Gazeta Flaka gjatë periudhës 12–15 shkurt.