Modriç ende nuk mendon që të tërhiqet nga kombëtarja e Kroacisë

Lojtari i Real Madridit, i cili për një muaj mbush 39 vjeç, u thirr nga Zlatko Dalic për ndeshjet zyrtare të Ligës së Kombeve në shtator, kundër Portugalisë dhe Polonisë. Ndonëse pas zhgënjimit të Europianit të fundit pati disa dyshime për vazhdimësinë e tij në kombëtare, mesfushori i bardhë, legjenda e “Bernabeut” dhe po ashtu e vendit të tij, nuk tërhiqet.

Ëndrra e Luka Modriçit është të jetë në gjendje të arrijë Kupën e Botës që do të mbahet në SHBA, Kanada dhe Meksikë në vitin 2026. Më pas do të jetë 40 vjeç, gati të mbushë 41 vjeç, një moshë e avancuar për çdo lojtar të Kupës së Botës, edhe pse gjithnjë e më e zakonshme po bëhet shfaqja në turne të mëdhenj të futbollistëve aq të rëndësishëm sa ai.

Ndodhi në Europianin e fundit me Pepe dhe Kristiano Ronaldo, ka mundësi të përsëritet në Kupën e Botës 2026 me yllin nga Madeira dhe Lionel Messi, të cilët kërkojnë të jenë lojtarët e parë në histori që do të jenë në gjashtë edicione të Botërorit. Modriçi, gjithashtu e konsideron veten pjesë të rëndësishme për kombëtaren kroate, e cila e ka të vështirë të gjejë zëvendësues cilësor të tij në mesfushë.

“Pensionimi” i fundit ndërkombëtar i Marselo Brozoviçit redukton edhe më shumë potencialin në atë repart, në të cilën Luka ka ende shumë për të dhënë në ndeshje të rëndësishme si ato që vijnë për kroatët, kundër portugezëve dhe polakëve. Në fakt, ai dhe Perishiç janë të vetmit që kanë mbetur nga “garda e vjetër”.