“SOS Vita” me kërkesa për Qeverinë në ardhje

Personat me aftësi të posaçme ankohen se Qeveria në ikje nuk bëri mjaftueshëm për përmirësimin e gjendjes së tyre. Nga shoqata SOS Vita apelojnë deputetët e sapozgjedhur dhe Qeverinë e ardhshme të bëjë ndryshime ligjore, posaçërisht në aspektin shëndetësor.

“Fatkeqësisht, një person me aftësi të kufizuara jeton me 11 mijë denarë, vetëm barnat janë mbi 12 mijë denarë. Një herë e përgjithmonë të rregullohen çështjet e personave me nevoja të veçanta. Pse një person me aftësi të kufizuara kur është qind për qind i palëvizshëm pse të pret të shkojë nëpër komisione të ndryshme. Unë jam 31 vjet në karrocë elektrike, a duhet që çdo herë ti tregoj komisionit që a jam a nuk jam person me aftësi të kufizuara. Ta marrin parasysh deputetët dhe ministrat që një herë e përgjithmonë të bëhet një jetë më e mirë për personat me nevoja të veçanta”, deklaroi Ertan Shaqiri, SOS Vita.

Zhivko Milevski tha se përveç pajisjes me karroca falas nga shteti është e domosdoshme të bëhen ndryshime edhe në listën pozitive të barnave.

“Deri në moshën 65 vjeçe nuk mund të marrim nga shteti karrocë, patjetër të anëtarësohemi në ndonjë shoqatë që të kemi të drejtë për karrocë ndërsa ne pa karrocë nuk mund të funksionojmë. Duhet të bëhet një listë e re pozitive për ato barna që vërtet na duhen. Nuk kemi ku të qarkullojmë, lëvizim nëpër rrugë, makinat pas nesh i bien burive, nuk ka nevojë për një gjë të tillë, unë nuk jam i sëmurë mentalisht që mos të largohem”, u shpreh Zhivko Milevski, me aftësi të posaçme.

Për momentin, në shoqatën SOS Vita ka mbi 400 anëtarë me diagnoza të ndryshme, të cilët sipas drejtuesve të shoqatës kanë nevoja të shumta për të mbijetuar. /Alsat.mk