Valbon Limani panelist në Forumin Ekonomik për Korridorin VIII në Tiranë: Gostivari në nyje strategjike të zhvillimit rajonal

Kryetari i Komunës së Gostivarit, Valbon Limani, mori pjesë si panelist në Forumin Ekonomik “Ndërlidhja Strategjike dhe Rritja Ekonomike Rajonale: Potenciali Ekonomik i Korridorit VIII”, organizuar nga Ministria për Evropën dhe Diasporën në Tiranë. Në këtë forum morën pjesë figura të larta shtetërore nga Shqipëria, rajoni dhe Evropa.

Në fjalën e tij, Limani theksoi se Korridori VIII nuk është më vetëm një projekt në letër, por një realitet në terren, me progres të dukshëm në aksin Tetovë–Gostivar dhe Gostivar–Kërçovë, që kalon edhe nëpër territorin e Komunës së Gostivarit.

Ai nënvizoi ndikimin e drejtpërdrejtë të këtij korridori në zhvillimin ekonomik, hapjen e vendeve të reja të punës, përkrahjen e turizmit dhe rritjen e konkurrueshmërisë së rajonit.

Gjatë diskutimit, Limani vuri në pah edhe rëndësinë strategjike të portit të ri të Porto Romano në Durrës, i cili sipas tij do t’i shërbejë jo vetëm Shqipërisë, por edhe Maqedonisë së Veriut dhe rajonit më gjerë, duke mundësuar dalje më të shpejtë në det dhe ulje të kostove logjistike.

Ai theksoi se si komunë janë të përkushtuar që zhvillimi i Korridorit VIII të ecë paralelisht me mbrojtjen e mjedisit, rritjen e sigurisë rrugore dhe sigurimin e përfitimeve konkrete për qytetarët e Gostivarit.

Sipas Limanit, Korridori VIII përfaqëson një mundësi historike për transformimin ekonomik të rajonit dhe për forcimin e ndërlidhjes strategjike mes vendeve të Ballkanit dhe më gjerë. Gazeta Flaka