Shefja e diplomacisë bullgare: Presim që Maqedonia e Veriut të heqë dorë nga narrativa antibullgare

Velislava Petrova: Dialogu do të jetë i vështirë derisa Shkupi të gjejë një qasje politike që nuk bazohet në qëndrime kundër Bullgarisë

Ministrja e Punëve të Jashtme e Bullgarisë, Velislava Petrova, ka deklaruar se pret që Republika e Maqedonisë së Veriut të jetë e gatshme të ndërtojë një narrativë politike që nuk është e orientuar kundër Bullgarisë. Sipas saj, kjo është një nga çështjet që kushtëzon zhvillimin e dialogut ndërmjet dy vendeve dhe procesin e integrimit evropian të Maqedonisë së Veriut.

Duke folur gjatë seancës së kontrollit parlamentar në Kuvendin bullgar, Petrova komentoi edhe kërkesat e përfaqësuesve të Maqedonisë së Veriut për përfshirjen e një ndërmjetësi në bisedimet ndërmjet dy shteteve.

Ajo e cilësoi si të pazakontë kërkesën për ndërmjetësim ndërmjet një shteti anëtar të Bashkimit Evropian dhe një vendi kandidat, duke theksuar se marrëveshjet dhe korniza përkatëse nuk kanë karakter thjesht bilateral, por janë miratuar edhe në nivel evropian.

“Është, për ta thënë më së buti, jo e zakonshme që të ketë ndërmjetësues ndërmjet një vendi anëtar të BE-së dhe një vendi kandidat, mbi bazën e marrëveshjeve që nuk kanë karakter bilateral, por janë miratuar dhe konfirmuar edhe në nivel evropian. Ky është qëndrimi shumë i qartë i Bullgarisë”, deklaroi Petrova.

Ajo theksoi se nga Shkupi pret një ndryshim të qasjes politike dhe gatishmëri për të ndërtuar një narrativë që nuk mbështetet në qëndrime antibullgare.

“Është e rëndësishme që nga Republika e Maqedonisë së Veriut të shohim gatishmëri për një narrativë politike që nuk është antibullgare, e cila deri më tani ka qenë dominante”, u shpreh ministrja.

Petrova iu përgjigj pyetjes së deputetit të GERB-SDS-së, Georg Georgiev, lidhur me mundësinë e zhvillimit të dialogut bilateral në nivel të lartë ndërmjet përfaqësuesve të Bullgarisë dhe Maqedonisë së Veriut për procesin e integrimit evropian.

Sipas saj, Bullgaria shpreson që autoritetet në Shkup të gjejnë logjikën dhe qasjen politike që do t’u mundësonte ta bazojnë procesin e integrimit në një tezë tjetër nga ajo që, sipas saj, është e orientuar kundër Bullgarisë.

“Shpresojmë që ata të gjejnë logjikën dhe qasjen politike që do t’u mundësojë ta bazojnë anëtarësimin e tyre në një tezë të ndryshme nga ajo antibullgare”, deklaroi Petrova, duke shtuar se dialogu do të mbetet i vështirë përderisa kjo nuk ndodh.

Ministrja bullgare i cilësoi si të pabazuara pretendimet se Sofja mund të parashtrojë kërkesa të reja ose të ndryshojë qëndrimin e saj tashmë të përcaktuar ndaj Maqedonisë së Veriut.

Ajo sqaroi se qeveria dhe Ministria e Punëve të Jashtme të Bullgarisë në raportet me Shkupin udhëhiqen nga konsensusi i vitit 2022 dhe vendimet e mëvonshme të Kuvendit bullgar, të cilat, sipas saj, përcaktojnë qartë pozicionin zyrtar të Sofjes.

Në të njëjtën seancë, ish-ministri i Jashtëm bullgar, Georg Georgiev, i dha një këshillë kolegiale ministres Petrova lidhur me përpjekjet e saj për të gjetur logjikën politike në veprimet e autoriteteve në Shkup.

“Një këshillë miqësore mes kolegësh. Ju po kërkoni logjikë politike në veprimet e tyre, por ajo nuk ekziston. Disa herë jemi përpjekur të gjejmë bazë për veprimet dhe retorikën e tyre. Në sjelljen e tyre nuk ka absolutisht asnjë logjikë”, deklaroi Georgiev.

Deklaratat e fundit nga Sofja dëshmojnë se qëndrimi bullgar lidhur me procesin evropian të Maqedonisë së Veriut mbetet i lidhur me zbatimin e konsensusit të vitit 2022, ndërsa çështja e qasjes politike të Shkupit vazhdon të jetë pjesë e debatit bilateral. Gazeta Flaka

22

„Duke pasur parasysh protestat në shtetet e rajonit dhe të botës, a mendoni se edhe Maqedonia e Veriut do të përfshihet në këtë valë të protestave sociale?“

Po, është koha.

16

Jo, nuk mendoj.

6

Nuk ka arsye për të protestuar.

0