Përkundër ikjes dhe varfërisë, po lulëzon blerja e banesave!

Ekspertët thonë se tendenca e rritjes së çmimeve vjen si pasojë e kërkesës së lartë dhe ofertës së kufizuar, megjithëse fuqia blerëse e qytetarëve është në rënie

Çmimet e banesave në Shkup vazhdojnë të rriten me një rritje prej 20% krahasuar me vitin paraprak, ndërsa as varfëria dhe as kushtet e përkeqësuara sociale ekonomike nuk e ulin interesimin për blerjen e pasurive të patundshme në Shkup. Tendenca e rritjes së çmimeve vjen si pasojë e kërkesës së lartë dhe ofertës së kufizuar, megjithëse fuqia blerëse e qytetarëve është në rënie. Ekspertët paralajmërojnë se ky trend mund të vazhdojë duke qenë se materialet e ndërtimit ende janë të shtrenjta dhe puna është e kufizuar, shkruan gazeta KOHA.

Emigrimi i qytetarëve krijon një zbrazëti në vend, ku gjithnjë e më pak njerëz mbeten për të jetuar dhe punuar në të, ndërsa ky ndryshim demografik po ngre shqetësime për të ardhmen e zonave urbane dhe rurale, me propozime për të futur politika që do të kufizonin presionin mbi infrastrukturën dhe burimet e qytetit. Nga ana tjetër, varfëria vazhdon të mbetet një problem serioz ku sipas një sondazhi, numri i të varfërve në vend është rritur në mënyrë dramatike, me parashikime për një rritje të mëtejshme në vitet në vijim.

“Pa një strategji të qartë dhe vullnet politik, Maqedonia e Veriut do ta ketë të vështirë të luftojë trendin në rritje të varfërisë. Nisur nga këto sfida, politikat sociale dhe ekonomike duhet të rishikohen dhe të përshtaten me realitetet e reja. Është e nevojshme të merren parasysh pasojat afatgjate të emigracionit dhe varfërisë, si dhe të krijohen kushtet që do t’i mbajnë qytetarët në vend dhe do të përmirësojnë perspektivat e tyre ekonomike”, këshillojnë ekspertët. (koha.mk)