Rriten rastet e gripit në Maqedoninë e Veriut, Tetova kryeson me 48 të infektuar

Gjatë javës së fundit të tetorit janë regjistruar 116 raste me grip dhe sëmundje të ngjashme me gripin, një rritje prej 90,2 për qind krahasuar me javën paraprake. Tetova prin me numrin më të madh të të prekurve, ndërsa në Gostivar janë regjistruar shtatë raste.

Numri i rasteve me grip dhe sëmundje të ngjashme me gripin në Maqedoninë e Veriut ka shënuar rritje të ndjeshme. Gjatë periudhës 26 tetor – 1 nëntor janë regjistruar gjithsej 116 raste, kundrejt 61 rasteve të raportuara një javë më parë, që paraqet rritje prej 90,2 për qind.

Sipas raportit më të fundit të Institutit të Shëndetit Publik (ISHP), numri i të prekurve është rritur edhe në krahasim me të njëjtën periudhë të sezonit të kaluar, kur ishin regjistruar 94 raste. Kjo paraqet rritje prej 23,4 për qind.

Tetova me numrin më të madh të rasteve

Gjatë javës raportuese, numri më i madh i rasteve është regjistruar në Tetovë, me 48 të prekur. Pas saj renditet Kumanova me 26 raste dhe Shkupi me 13.

Në Prilep dhe Gostivar janë regjistruar nga shtatë raste, në Ohër dhe Negotinë nga tri, në Strumicë, Veles dhe Manastir nga dy, ndërsa në Radovish është raportuar një rast.

Sa i përket grupmoshave, pjesa më e madhe e të prekurve, gjithsej 84 persona, janë të moshës 15 deri në 64 vjeç. Gjithashtu, janë regjistruar 25 raste te personat mbi 65 vjeç dhe shtatë raste te fëmijët e moshës 5 deri në 14 vjeç.

Që nga fillimi i sezonit të gripit 2026/2027, në vend janë regjistruar gjithsej 343 raste me grip dhe sëmundje të ngjashme me gripin, që është 1,5 për qind më shumë krahasuar me të njëjtën periudhë të sezonit të kaluar. Numri më i madh i të prekurve, gjithsej 127, është regjistruar në Tetovë.

Katër mostra pozitive për grip, një për koronavirus

Në laboratorin virologjik të ISHP-së, gjatë javës së fundit raportuese janë testuar 47 mostra. Prej tyre, katër kanë rezultuar pozitive për virusin e gripit, ndërsa një mostër ka rezultuar pozitive për koronavirusin SARS-CoV-2.

Megjithëse numri i rasteve është në rritje, nga Instituti theksojnë se aktiviteti i gripit vazhdon të jetë në nivelin ndërsezonal dhe se ende nuk është arritur pragu epidemiologjik për fillimin e sezonit të gripit.

ISHP me rekomandime për mbrojtje nga gripi

Instituti i Shëndetit Publik rekomandon shmangien e kontaktit të afërt me personat që kanë simptoma të infeksioneve respiratore, si kollitja, teshtitja dhe temperatura e lartë, si dhe shmangien e qëndrimit në ambiente të mbipopulluara.

Ndër masat kryesore parandaluese përfshihen:

• Larja e rregullt e duarve me ujë dhe sapun ose përdorimi i dezinfektuesve.
• Ajrosja e shpeshtë e ambienteve të mbyllura.
• Veshja e përshtatshme dhe konsumimi i sasive të mjaftueshme të lëngjeve.
• Ushqimi i larmishëm, i pasur me vitamina dhe minerale.
• Gjumi i mjaftueshëm, pushimi dhe aktiviteti fizik.

Personat që preken nga gripi këshillohen të qëndrojnë në shtëpi, të shmangin kontaktet me të tjerët dhe të konsumojnë mjaftueshëm lëngje. Gjatë kollitjes dhe teshtitjes duhet të mbulojnë hundën dhe gojën, të kujdesen për higjienën e duarve dhe të përdorin maskë mbrojtëse gjatë kontaktit me anëtarët e familjes, transmeton Gazeta Flaka – Maqedoni.

Personat mbi 65 vjeç, ata me sëmundje kronike, si dhe personat te të cilët simptomat përkeqësohen ose zgjasin disa ditë, duhet të kërkojnë ndihmë mjekësore.

Vaksinimi, mbrojtja më efektive kundër gripit sezonal

ISHP rikujton se vaksinimi është mënyra më efektive për mbrojtjen nga gripi sezonal, veçanërisht për grupet me rrezik të shtuar.

Vaksinimi rekomandohet posaçërisht për personat mbi 65 vjeç, fëmijët e moshës 6 deri në 59 muaj, personat me sëmundje kronike, gratë shtatzëna dhe punonjësit shëndetësorë.

Në Maqedoninë e Veriut, vaksinimi kundër gripit ka filluar më 21 tetor dhe realizohet në qendrat e shëndetit publik, njësitë e tyre rajonale dhe shtëpitë e shëndetit. Caktimi i termineve për vaksinat falas bëhet përmes platformës zyrtare <Link url=”https://www.vakcinacija.mk” title=”vakcinacija.mk”/>.

Sipas të dhënave të Drejtorisë për Shëndetësi Elektronike, deri në mbylljen e raportit janë vaksinuar gjithsej 11.629 persona nga kategoritë e rrezikuara të popullsisë. Gazeta Flaka

15

„Duke pasur parasysh protestat në shtetet e rajonit dhe të botës, a mendoni se edhe Maqedonia e Veriut do të përfshihet në këtë valë të protestave sociale?“

Po, është koha.

13

Jo, nuk mendoj.

2

Nuk ka arsye për të protestuar.

0